10 декабрь куни Инновацион ривожланиш вазирлиги биносида Ўзбекистонда янги коронавирус рекомбинант вакцинаси (CHO ҳужайра) халқаро клиник синовларининг III фазаси бошланишига бағишланган маросим ўтказилди. Маросимда Бош вазир ўринбосари Беҳзод Мусаев, Инновацион ривожланиш вазири Иброҳим Абдураҳмонов, Хитойнинг Ўзбекистондаги Фавқулодда ва мухтор элчиси Цзян Янь, Chongqing Zhifei Biological компаниясининг раиси ва бош директори Цзян Реншэн, Хитой Фанлар академиясининг Микробиология институти илмий ходимлари қатнашдилар.

Инновацион ривожланиш ҳамда Соғлиқни сақлаш вазирликлари томонидан Хитойнинг Хитой Фанлар академияси Микробиология институтининг ишланмаси асосида Zhifei Longcom Biopharmaceutical Co., Ltd компанияси  ишлаб чиққан коронавирусга қарши вакцинанинг учинчи босқич клиник синовларини ўтказиш ишлари бошланди.

Хитойдаги Ўзбекистон элчихонаси ёрдамида Ўзбекистонга Zhifei компанияси томонидан 6000 дона синов вакцинаси (50% ҳақиқий вакцина, 50 % плацебо), 12 минг дона ПЗР тестлар, 8 минг дона антитаналарни аниқловчи тестлар хамда барча ишлатиладиган ёрдамчи материаллар (шприц, ниқоб, кўзойнак, криопробиркалар, ҳомиладорлик тестлари) олиб келинди.

Клиник синовларни ўтказиш учун жами 5 минг нафар кўнгиллилар танлаб олинди. Жараённинг этик жиҳатларини эътиборга олган ҳолда кўнгиллиларнинг шахси ошкор қилинмаслигига келишилди.

Ўз навбатида,  Zhifei Longcom Biopharmaceutical Co. Ltd компаниясининг 8 нафар мутахассислари Инновацион ривожланиш вазирлиги ҳузуридаги  Илғор технологиялар маркази ҳамда Соғлиқни сақлаш вазирлигидаги Вирусология илмий-тадқиқот институти ходимлари билан биргаликда синов ўтказиладиган поликлиникалари врач ва ҳамширалари учун вакцинация тадбирларини амалга ошириш бўйича тренинглар ўтказдилар.

Zhifei Longcom Biopharmaceutical Co. Ltd компаниясининг Ўзбекистонда III фаза синовларидан ўтаётган вакцинаси.

Мазкур компания томонидан ишлаб чиқилган ва ҳозирда клиник синовдан ўтиши бошланадиган вакцина коронавирус юза антигенининг генетик-муҳандислик оқсили бўлиб, у аденовирус ҳамда инактивлашган вакцина турлари билан таққосланганда юқори даражада хавфсиз ҳисобланади. Яъни рекомбинант оқсил кўринишидаги вакцина вируснинг бир бўлагини юқори технологиялар асосида сунъий кўпайтириб олишга асосланган.  Генетик-муҳандислик оқсили зарарланган организмда айнан унга қарши антитаначалар ишлаб чиқаради.

Ушбу вакцина I ва II фаза клиник синовларда нисбатан юқори хавфсизлик профилига эгалигини намоён этди. Инновацион ривожланиш вазирлиги раҳбариятининг 20 та кўнгилли оила аъзолари Хитойдан олиб келинган рекомбинант вакцина билан биринчи дозада эмланди.