Assalomu alaykum, qadrli vatandoshlar!

Muhtaram mehmonlar!

Xonimlar va janoblar!

Siz, azizlarni, ko‘pmillatli butun xalqimizni, xorijdagi vatandoshlarimizni O‘zbekiston mustaqilligining o‘ttiz to‘rt yillik shonli sanasi bilan chin qalbimdan tabriklayman.

Istiqlol bayrami barchamizga muborak bo‘lsin!

Hurmatli do‘stlar!

Bugun, mana shu ulug‘ ayyom kunlarida hammamiz bir hayotiy haqiqatni chuqur his etmoqdamiz. Yangi O‘zbekiston g‘oyasi asosida boshlagan ulkan islohotlarimiz tufayli mustaqillik bergan huquq va erkinliklarni har bir yurtdoshimiz o‘z hayotida chuqur his qilib, bu imkoniyatlardan keng foydalanmoqda.

Aynan ana shu ulug‘vor g‘oya asosida biz uch ming yillik boy tarix va madaniyatimizni qaytadan idrok etdik. Yurtimiz zaminidagi Birinchi va Ikkinchi Renessans an'analarini rivojlantirib, Uchinchi Renessans sari dadil amaliy qadamlar qo‘ymoqdamiz.

Ishonchim komil, bu yo‘lda Yangi O‘zbekiston davlati, Yangi O‘zbekiston jamiyati buyuk tariximizni yangi – yanada yuksak Uyg‘onish davri bilan bog‘laydigan mustahkam ko‘prik bo‘lib xizmat qiladi.

Mir Alisher Navoiy bobomizning “Bu olamni yaratishdan maqsad – inson edi, uni baxtli ko‘rish edi”, degan fikrlarida chuqur ma'no mujassam. Xalqimiz asrlar davomida orzu qilib, kurashib o‘tgan inson qadrini ulug‘lash, uni baxtli qilish – barcha islohotlarimizning ma'no-mazmunini tashkil qilmoqda.

“Inson qadri uchun, inson baxti uchun” degan ezgu tamoyilga asoslangan Yangi O‘zbekiston g‘oyasi amalda qudratli harakatga aylandi.

Dunyodagi murakkab vaziyatga qaramasdan, iqtisodiyotimiz 6 foizdan yuqori sur'atlarda barqaror o‘sayotgani xalqimiz o‘z tanlab olgan yo‘lidan dadil borayotganini ko‘rsatmoqda.

Yurtimiz aholisi yiliga o‘rtacha 700-800 ming kishiga ko‘paymoqda. Mehnat bozoriga har yili 500-600 ming nafar yoshlar kirib kelmoqda. Buncha odamni o‘qitish, kasb-hunarli qilish, ularga ish topib berish o‘z-o‘zidan bo‘lmaydi, albatta. Buning uchun muntazam ishlaydigan tizim, kafolatli investisiya va infratuzilma kerak.

Shuni oldindan chuqur o‘ylab, biz bu yo‘nalishda aniq dasturlarni qabul qildik. Biz mahallagacha tushib, o‘zini o‘zi band qilgan tadbirkordan tortib yirik biznesgacha – barchasini alohida yondashuv asosida qo‘llab-quvvatlash bo‘yicha tizim barpo etdik.

To‘la ishonch bilan aytish mumkinki, Yangi O‘zbekistonda tadbirkorlik iqtisodiyotni harakatga keltiruvchi, oldinga boshlovchi katta kuchga aylandi.

Raqamlarga e'tibor beraylik: keyingi sakkiz yilda yalpi ichki mahsulotimiz 2 karra oshib, o‘tgan yili 115 milliard dollarga, eksport hajmi 26 milliard dollarga yetdi. Yil yakuni bilan yalpi ichki mahsulotimiz 130 milliard dollar bo‘ladi. Oltin-valyuta zaxiralarimiz tariximizda ilk bor 48 milliard dollardan oshdi, o‘tgan sakkiz yilda yurtimizga qariyb 130 milliard dollar xorijiy investisiyalar kirib keldi.

Bularning barchasi islohotlarimiz samarasi, taraqqiyotimizning mustahkam kafolati, nufuzli moliya institutlari va xorijiy kompaniyalarning yuksak ishonchi emasmi?

Xalqimizning ko‘z o‘ngida minglab zamonaviy korxonalar, ijtimoiy-iqtisodiy infratuzilma ob'ektlari qad rostlamoqda. E'tibor bering, bu yil jami 35 milliard dollar investisiya evaziga 9 mingga yaqin yangi korxona, xizmat ko‘rsatish majmualari barpo etiladi. Eng ulug‘ bayramimiz arafasida 4 milliard dollarlik 79 ta yirik ob'ekt ishga tushirildi.

O‘tgan davrda birgina kichik va o‘rta tadbirkorlar soni 2 karra ko‘paydi. Bugun ushbu tarmoqda 10 milliondan ortiq aholimiz mehnat qilib, daromad topmoqda.

Biz yil boshida 5,5 million aholi bandligini ta'minlash bo‘yicha katta marra olgan edik. Sakkiz oydayoq 5 millionlik rejani uddaladik.

Eng muhimi, islohotlarimizga ishonib, shu yilning o‘zida chetda ishlayotgan 700 ming fuqaromiz yurtimizga, o‘z oilasi bag‘riga qaytdi.

An'anamizga ko‘ra, o‘tgan haftada tadbirkorlar bilan ochiq muloqot o‘tkazib, biznes vakillari qanday masalani ko‘targan bo‘lsa, hammasiga yechim topib berdik. Ular uchun 50 trillion so‘mdan ortiq yangi resurs, imtiyoz va yengilliklar yaratishga kelishib, qarorini ham chiqardik. Biz bu ishlarni qat'iy davom ettiramiz.

O‘zbekiston dunyoga keng ochilganidan so‘ng xorijiy sayyohlar soni o‘tgan yili 10 million kishidan, turizm xizmatlari eksporti esa 3 milliard dollardan oshdi.

Tariximiz, milliy o‘zligimizni tiklash maqsadida bunyod etilayotgan Islom sivilizasiyasi markazi, Samarqanddagi Imom Buxoriy ziyoratgohi kabi ulkan va noyob majmualarda qurilish va obodonlashtirish ishlari yakuniga yetmoqda.

Ishonchim komil, xalqimizning ma'naviy salohiyatiga har tomonlama munosib bo‘lgan bunday betakror obidalar aholimiz va jahon jamoatchiligi uchun yangi va jozibador maskanlarga aylanadi. Bu majmualar tadbirkorlarimizga sayyohlarni yanada ko‘proq jalb qilishda qo‘shimcha imkoniyatlar eshigini ochadi.

Yana bir maqsadimiz – halol ishlagan tadbirkorlarni qo‘llab-quvvatlash, ularga imkoniyatlarni ko‘paytirishdan iborat.

Shu sababli “Halol mehnat – xotirjam hayot va farovon jamiyat garovi” degan shior asosida “yashirin” iqtisodiyotni jilovlash bo‘yicha muhim chora-tadbirlarni amalga oshirmoqdamiz. Bu jarayonda fuqarolik institutlari, jamoatchilik nazorati cub'ektlari, ommaviy axborot vositalari, parlament va mahalliy kengashlar yanada faol ishti

Iqtisodiyotimiz rivojlanishi, aholimiz ko‘payishi bilan xavfsiz va barqaror energiya resurslariga talab ortib bormoqda.

O‘tgan sakkiz yilda abonentlar soni 25 foizga, ya'ni,  qo‘shimcha 1 million 600 mingtaga, iste'mol hajmi esa 54 foizga yoki qo‘shimcha 25 milliard kilovatt soatga oshdi. Shuning uchun biz kelgusi taraqqiyotimizni “yashil” iqtisodiyot rivojida ko‘rmoqdamiz.

Avvalo, “yashil” energiya ulushini oshirish bo‘yicha misli ko‘rilmagan qadamlar qo‘ydik. Natijada elektr ishlab chiqarish quvvatlari 2016 yildagi 59 milliard kilovatt soatdan 85 milliard kilovatt soatga yetdi, kelgusi yilda bu 97 milliard kilovatt soatdan ziyodni tashkil etadi.

Shu yilning o‘zida 6,5 milliard kilovatt soat “yashil” energiya ishlab chiqarildi. Eng muhimi, jami generatsiya quvvatlarida “yashil” energiya ulushi 30 foizga yetdi.

Biz 2030 yilgacha yana 35 milliard dollar to‘g‘ridan-to‘g‘ri investisiya hisobidan “yashil” energiya ulushini 54 foizga olib chiqamiz.

Tabiatga mehrli munosabat orqali kelajak avlodlarga unumdor yer, zilol suv, musaffo havoga ega bo‘lgan go‘zal Vatanni meros qilib qoldirishni muqaddas burchimiz, deb bilamiz.

Shu maqsadda “Yashil makon” umummilliy loyihasi doirasidagi ishlarimizni yanada kengaytiramiz. Bu borada “Atrof-muhitni asrash va “yashil” iqtisodiyot yili”da amalga oshirayotgan katta dasturlarimiz muhim ahamiyat kasb etadi.

Keyingi sakkiz yilda yurtimizda 31 million kvadrat metrdan ortiq yoki qariyb 12 mingta ko‘pqavatli uy-joy barpo etilgani tarixiy qadam bo‘ldi. Shu yilning o‘zida “Yangi O‘zbekiston” va boshqa massivlarda yana 130 ming xonadonli zamonaviy uy-joylar qurilib, aholiga topshiriladi.

2030 yilgacha butun dunyoda qo‘llanayotgan “yashil shahar” standartlari asosida barcha shaharlarimizda yashillik darajasini 30 foizga yetkazamiz.

Natijada mamlakatimiz barqaror energiya bilan ta'minlanadi, ekologiyaga, odamlarimiz salomatligiga zararli ta'sirlar keskin kamayadi.

Shu bilan birga, master rejalar asosida har bir qishloq va mahallaga shahardagi qulayliklarni olib kiramiz. Kichik shaharlarni zamonaviy infratuzilma asosida rivojlantirib, ularni yangi bosqichga ko‘taramiz.

Biz yurtimizda ijtimoiy himoya siyosatining butunlay yangi modelini yaratdik. Bu tizim xonadonlargacha kirib borgani, ehtiyojmand aholi bilan individual ishlashni yo‘lga qo‘yganimiz, “Inson” markazlarini tashkil etganimiz – barcha uchun teng imkoniyat yaratilgan inklyuziv jamiyatni shakllantirishga xizmat qilmoqda.

Hammamiz bir haqiqatni tushunib olishimiz kerak: yurtimizda begona odam ham, begona bola ham yo‘q. Barchamiz yagona yurt farzandlarimiz, yagona Vatan ravnaqiga xizmat qilamiz.

Shu ma'noda, bitta bo‘lsa ham qiyin ahvolga tushib qolgan hamyurtimiz taqdiri barchamizni birdek tashvishga solishi kerak.

Chunki, xalqimizning eng katta qudrati – mehr-oqibat, saxovat va birdamlikdadir.

Shu borada “Hamrohlik dasturi”ga muvofiq  ota-ona mehridan mahrum bo‘lgan 11 ming nafar bolani ta'lim, kasb-hunar, sport tizimiga qamrab olganimiz muhim natija bo‘ldi. Ehtiyojmand oilalarning 2,5 milliondan ziyod a'zolariga 110  turdagi yordam va xizmatlar ko‘rsatish yo‘lga qo‘yildi. Umuman, bu yilning o‘zida yordamga muhtoj aholini ijtimoiy himoya qilishga 19 trillion so‘m mablag‘ yo‘naltiryapmiz.

Bularning barchasi o‘z samarasini berib, yurtimizda kambag‘allik darajasini 6,8 foizga tushirishga erishdik. Xalqaro tashkilotlar 5-6 yil oldin ushbu raqamni 35 foiz atrofida baholaganini hisobga olsak, qisqa davrda bu borada qanday  katta yo‘lni bosib o‘tganimiz yaqqol ayon bo‘ladi.

Biz tadbirkorlikni rivojlantirish, keksalar, xotin-qizlar, yoshlar, ijtimoiy yordamga muhtoj insonlarni qo‘llab-quvvatlash, kambag‘allikni qisqartirish bo‘yicha ishlarimizga yangi shiddat beramiz.

Xalqimiz uchun munosib sharoitlar yaratish borasidagi islohotlarimiz bir daqiqa ham to‘xtamaydi.

Muhtaram do‘stlar!

Sifatli ta'lim-tarbiya, aholimiz salomatligi – kelgusi taraqqiyotimizni hal qiladigan eng muhim masala.

So‘nggi sakkiz yilda xususiy sektor bilan birga bog‘chalardagi o‘rinlarni  2,5 millionga, qamrovni 78 foizga yetkazdik. Yangi maktablar qurganimiz, borlarini kengaytirganimiz hisobiga qo‘shimcha 1 millionta o‘quvchi o‘rni yaratildi.

Zamonaviy darsliklar, ilg‘or pedagogik texnologiyalar asosida maktab ta'limiga yangi mazmun, yangi sifat kirib kelmoqda.

Shu davrda oliy ta'limda ham keskin burilish yasab, qamrovni 9 foizdan 42 foizga yetkazdik. Ayniqsa, talabalarning 53 foizini xotin-qizlarimiz tashkil etayotgani alohida e'tiborga sazovor.

Hozirgi vaqtda dunyodagi top oliygohlarda 2 mingdan ziyod talabalarimiz tahsil olmoqda. Ulardan 750 nafari “El-yurt umidi” jamg‘armasi orqali davlat hisobidan o‘qimoqda.

O‘tgan yili yurtimiz yoshlari top-500 talik oliygohlarga kirish bo‘yicha Markaziy Osiyoda birinchi o‘rinni egallagani barchamizni albatta quvontiradi.

Ayniqsa, farzandlari dunyodagi eng nufuzli universitetlarda ta'lim olayotgan ota-onalarning xursandchiligini so‘z bilan ifoda qilib bo‘lmaydi.

Shu o‘rinda bu yildan boshlab maktablarimizda katta bir ijobiy holat ko‘zga tashlanayotganini alohida ta'kidlab aytmoqchiman. Ya'ni, yurtimizdagi 3 ta maktab oliygohlarga kirish bo‘yicha 100 foizlik natijaga erishdi. Bular – Qorako‘l tumanidagi maktab-internat, Navoiy shahridagi 1-sonli ixtisoslashgan maktab-internat, Jizzax shahridagi Hamid Olimjon va Zulfiya nomidagi ijod maktabi.

Bu, albatta, “Yangi O‘zbekiston maktab ostonasidan boshlanadi” degan ezgu g‘oyamizning amaldagi ifodasidir. Ishonaman, bunday natijalardan yurtimizdagi boshqa maktablar ham albatta o‘rnak oladi. Barcha ta'lim dargohlariga Uchinchi Renessans nafasi yanada kuchliroq kirib boradi.

So‘nggi yillarda tibbiyot uchun mablag‘larni 6 karra oshirdik, sifatli tibbiy xizmatlarni mahallagacha tushirdik.

Odamlarimiz yuqori texnologik tibbiy xizmatlar uchun oldin faqat poytaxtga kelardi. Hozir bunday amaliyotlarning 400 dan ortig‘i viloyat va tumanlarning o‘zida bajarilmoqda.

Kasalliklarni profilaktika qilish, aholi o‘rtasida sog‘lom hayot tarzini qaror toptirishga katta ahamiyat qaratyapmiz.

Aholining turmush sharoitlari yaxshilanib borayotgani natijasida o‘rtacha umr ko‘rish darajasi 73,8 yoshdan 75,1 yoshga uzaydi.

Biz ta'lim-tarbiya uchun, aholi salomatligi uchun, muallim va shifokorlarni qo‘llab-quvvatlash uchun qancha kuch va qancha mablag‘ kerak bo‘lsa, barchasini safarbar etamiz!

Qadrli yurtdoshlar!

Bugungi yoshlarimizning ovozi, g‘oya va tashabbuslari, kuch-g‘ayrati barcha soha va tarmoqlarga chuqur kirib bormoqda. Ular xalqimizning necha yillik orzu-armonlarini real haqiqatga aylantirmoqda.

Yoshlarimizning zamonaviy bilim va kasb-hunarlarni, ona tili bilan birga chet tillarini puxta o‘rganishlari uchun imkoniyatlar tobora kengayib bormoqda.

Bugun davramizda sanoat, servis, qishloq xo‘jaligi, IT, ilm-fan, madaniyat va sportda katta yutuqlarga erishayotgan o‘g‘il-qizlarimizni ko‘rib turganimdan xursandman.

Mana, futbol bo‘yicha milliy terma jamoamiz mamlakatimiz tarixida ilk bor jahon chempionati yo‘llanmasini qo‘lga kiritib, ko‘p yillik orzu-umidimizni ro‘yobga chiqardi.

Talaba yoshlarimiz esa Xalqaro yozgi universiada o‘yinlarida 116 ta davlat orasida ilk bor top-15 talikka kirdi, Markaziy Osiyoda birinchi o‘rinni egalladi.

Ushbu bayram arafasida 19 va 22 yoshli bokschilarimiz Osiyo chempioni degan yuksak unvonga sazovor bo‘lib, o‘zbek boks maktabining shuhratini dunyoga yana bir bor namoyon etdi.

Sog‘lom va barkamol avlodni tarbiyalash, O‘zbekistonni chinakam sport mamlakatiga aylantirish maqsadida istiqbolli o‘g‘il-qizlarimizga atab Toshkentda ulkan Olimpiya shaharchasini barpo etdik.

Mamlakatimiz tarixida birinchi marta zamonaviy ta'lim va bilim beradigan Futbol akademiyasi qad ko‘tardi.

Ishonchim komil, zamonaviy sport arxitekturasining noyob durdonasi bo‘lgan ushbu majmualar minglab bo‘lg‘usi chempionlarimiz uchun yuksak parvoz maydoniga aylanadi.

Shu yilning o‘zida yoshlarimiz nufuzli xalqaro fan olimpiadalarida 2 ta oltin, 8 ta kumush, 5 ta bronza medalini qo‘lga kiritdi. Biz Mustaqil Davlatlar Hamdo‘stligi mamlakatlari o‘rtasida kimyodan – ikkinchi, matematika va iqtisodiyotda – uchinchi, IT va geografiya bo‘yicha to‘rtinchi o‘rinni egallagan o‘g‘il-qizlarimiz timsolida bo‘lg‘usi xorazmiylar, beruniylar, ibn sinolarni ko‘ramiz.

Saflari tobora kengayib borayotgan bunday intiluvchan, iste'dodli yoshlar – Yangi O‘zbekistonning oltin avlodi, g‘ururimiz timsolidir.

Bugungi unutilmas damlarda men butun O‘zbekiston yoshlariga qarata aytmoqchiman.

Aziz farzandlarim, doimo yodda tuting:

baxt – intilganniki, g‘alaba – kurashganniki!

Kelajakni mardlar, tarixni g‘oliblar yaratadi.

Hamisha oldinga qarab intiling, bahodir o‘g‘lonlarim, oqila qizlarim!

Sizlarning ezgu ishlaringizda Vatan, xalq, Prezident barchangizga hamisha ishonchli tayanch va suyanch bo‘ladi.

Hurmatli yurtdoshlar!

Yangi O‘zbekiston inson qadri ustuvor bo‘lgan huquqiy davlat va shunday bo‘lib qoladi.

Biz odil sudlovga erishish uchun sud ishlarini to‘liq raqamlashtirish, inson omilini kamaytirib, sun'iy intellektdan keng foydalanish borasida faol ish olib bormoqdamiz. Iqtisodiy va ma'muriy ishlar bo‘yicha sud binosiga borib o‘tirishga hojat qolmaydi – taraflar sudda onlayn ishtirok etadi, sudlarda ochiqlik, oshkoralik  ta'minlanadi. Qisqacha aytganda, mamlakatimiz “raqamlashgan va adolatli sud davri” ostonasida turibdi, desak, mubolag‘a bo‘lmaydi.

Oxirgi uch yilda sudlangan shaxslarning 70 foiziga ozodlikdan mahrum qilish bilan bog‘liq bo‘lmagan jazolar tayinlandi. Uch mingga yaqin fuqaroga esa oqlov hukmi chiqarildi. Jazo muddatini o‘tayotgan va tuzalish yo‘liga qat'iy kirgan uch mingdan ziyod yurtdoshimiz afv etildi.

Kuni kecha yana ana shunday 523 nafar hamyurtimizni o‘z oilasi bag‘riga qaytarish bo‘yicha farmonni imzoladim.

Bunday tarixiy qadamlar vaqtinchalik kampaniya emas, balki davlat siyosati darajasidagi uzluksiz jarayondir. Biz “Vatan uchun, millat uchun, xalq uchun!” degan ezgu g‘oya asosida bu ishlarimizni yangi, yuksak bosqichga olib chiqamiz.

Xalqimiz farovonligiga salbiy ta'sir qilayotgan korrupsiya, monopoliya, byurokratiya, dabdababozlik, ma'naviy tahdidlarga qarshi kurashni keskin davom ettiramiz.

Muhtaram yurtdoshlar!

Jahonda geosiyosiy vaziyat o‘ta keskin tus olayotganini barchamiz ko‘rib turibmiz. Bunday tahlikali davrda O‘zbekistonning siyosiy yo‘li qanday bo‘lishi kerak? Shiddat bilan o‘zgarayotgan xalqaro maydonda o‘zimizga munosib o‘rinni egallash uchun nima qilishimiz zarur? Bu savollar har bir yurtdoshimizni o‘ylantiradi, albatta.

Hozirgi murakkab sharoitni hisobga olib, mustaqilligimizni, yurtimizdagi tinchlik, millatlar va dinlar o‘rtasida hamjihatlikni mustahkamlash uchun kelgusida ham bor kuch va imkoniyatlarimizni safarbar etamiz.

Bugun O‘zbekistonning ovozi mintaqaviy va xalqaro maydonda tobora baland yangramoqda. Yurtimiz jahondagi ko‘plab nufuzli sammitlar, xalqaro forumlar o‘tadigan siyosiy markazlardan biriga aylandi. Bu anjumanlar O‘zbekistonning dunyo ahlini tinchlik va hamkorlikka chorlaydigan ezgu da'vati sifatida namoyon bo‘lmoqda.

Shu o‘rinda tashqi siyosat borasidagi pozisiyamizni yana bir bor ta'kidlamoqchiman.

Eng avvalo, Markaziy Osiyo davlatlari bilan ko‘p asrlik do‘stlik, yaxshi qo‘shnichilik, strategik sheriklik va o‘zaro ishonch ruhidagi aloqalarimizni sifat jihatidan yangi bosqichga olib chiqamiz.

Mustaqil Davlatlar Hamdo‘stligi, Shanxay hamkorlik tashkiloti mamlakatlari bilan an'anaviy, keng qamrovli va strategik sheriklik aloqalarini yanada kengaytiramiz.

AQSh, Yevropa va boshqa rivojlangan davlatlar bilan savdo-iqtisodiy, moliyaviy, investisiyaviy va texnologik hamkorlikni rivojlantirish, keng ko‘lamli sheriklik va amaliy aloqalarni mustahkamlaymiz.

Janubiy Osiyo, Yaqin va O‘rta Sharq, Afrika mintaqasidagi mamlakatlar bilan yangi va istiqbolli yo‘nalishlarda o‘zaro manfaatli hamkorlik uchun transport-logistika yo‘laklarini yaratishga alohida e'tibor qaratamiz.

Afg‘oniston mintaqaviy va global xavfsizlikning muhim omili ekanidan kelib chiqib, ushbu mamlakatning hukumati bilan konstruktiv va amaliy hamkorlik olib borish zarur, deb bilamiz.

Biz Falastin xalqi Birlashgan Millatlar Tashkiloti rezolyusiyalari bilan tasdiqlangan huquqqa, ya'ni, o‘zining mustaqil davlatini barpo etish huquqiga ega, degan qat'iy pozisiyamizni yana bir bor bildiramiz.

El-yurtimiz urush va ofatlar vaqtida og‘ir vaziyatga tushib qolgan begunoh insonlarga doimo beg‘araz yordam ko‘rsatib kelgan.

Biz insonparvarlik an'analarimizga sodiq qolib, O‘zbekistonga olib kelingan Falastin fuqarolariga mehmonlarimiz sifatida zarur ijtimoiy, moddiy va ma'naviy yordam ko‘rsatish bo‘yicha maxsus farmon qabul qildik.

Bag‘rikeng, mehr-oqibatli xalqimiz ushbu farmonda ko‘zda tutilgan chora-tadbirlarni har tomonlama qo‘llab-quvvatlab, ularni amalga  oshirishda faol ishtirok etadi, deb ishonaman.

Nufuzli xalqaro va mintaqaviy tashkilotlar, moliya institutlari bilan yaqin hamkorlik doimiy e'tiborimiz markazida bo‘ladi.

Shu kunlarda Xitoyda yana bir yirik anjuman – Shanxay hamkorlik tashkiloti sammitida, uning doirasida ko‘plab uchrashuv va tadbirlarda ishtirok etamiz.

Shu sababli Mustaqillik bayramini bugun siz, azizlar bilan, xalqimiz bilan birgalikda nishonlab, el-yurtimizdan duo olib, ertaga yo‘lga chiqishni reja qilganmiz. Hech shubhasiz, ana shu sammit natijalari ham Yangi O‘zbekistonning dunyodagi o‘rni va mavqeini yuksaltirishga, ko‘p vektorli tashqi siyosat bo‘yicha strategik maqsadlarimizni amalga oshirishga xizmat qiladi.

Fursatdan foydalanib, tantanamizda ishtirok etayotgan xorijiy davlatlarning muhtaram elchilariga, xalqaro tashkilotlar vakillariga samarali hamkorlik uchun chin dildan minnatdorlik bildiraman.

Muhtaram do‘stlar!

Oldimizda qanday sinov va mashaqqatlar paydo bo‘lmasin, biz demokratik islohotlarni chuqurlashtirish, milliy birlik va hamjihatlikni mustahkamlash, xalqimizni rozi qilish yo‘lidan aslo ortga qaytmaymiz. Boshlagan buyuk ishlarimizni albatta oxiriga yetkazamiz.

Hech qachon unutmaylik: biz barchamiz bitta xalq, bitta mamlakat, bitta oilamiz!

Hammamizning taqdirimiz, kelajagimiz, baxtimiz va yutug‘imiz ham yagona va mushtarak.

Har bir vatandoshimning yutug‘i – bu mening yutug‘im, tashvishi – mening tashvishim, degan fikr bilan yashasak, yutug‘imiz ko‘payib, tashvishimiz albatta kamayib boradi.

Afsuski, dunyoda turli tahdid va xatarlar ko‘p. Ammo ularga qarshi birgalikda, bir tanu bir jon bo‘lib kurashsak, albatta yengamiz.

Ezgu maqsad sari qo‘lni qo‘lga berib, astoydil harakat qilsak, albatta yutamiz.

Har bir yurtdoshimiz hayotning o‘zi oldimizga qo‘yayotgan mana shunday o‘tkir talablarni chuqur anglab, jonajon Vatanimiz ravnaqi yo‘lida sidqidildan xizmat qiladi, deb ishonaman.

Bu ulug‘ ayyomda Yangi O‘zbekistonni barpo etishdek olijanob ishga munosib hissa qo‘shayotgan barcha insonlarga, mehnatkash, bag‘rikeng xalqimizga minnatdorlik bildirib, chin qalbimdan ta'zim qilaman.

Muhtaram vatandoshlarim!

Barchangizni Mustaqillik kuni bilan yana bir bor samimiy tabriklab, yuragimdagi eng ezgu tilaklarimni izhor etaman.

Olloh taolo aziz yurtimizni o‘z panohida asrasin!

Har bir inson, har bir oilaga tinchlik va xotirjamlik, qut-baraka, baxt-saodat hamisha yor bo‘lsin!

Yashasin O‘zbekiston davlati!

Yashasin O‘zbekiston xalqi!